Siguro sa tanang inila nga Pilipino niining panahuna, si Manny Pacquiao ang maoy labing inila. Busa bitaw sa iyang tanang sangka batok sa ma Mehikano, tanang tawo sa Pilipinas mihunong sa ilang gibuhat. Mga sibilyan, kawatan, kriminal, tulisan, sundalo, rebelde – tanan naminaw ug nitan-aw sa kulbahinam nga pakig kombate sa atong paisano — usa ka banggiitang manggugubat sa lona. Sa matag sukmad, mura ta ug lusapan. Sa matag dawat ni Manny sa komo sa iyang kaatbang, murag musaka atong kabuhi. Pero sa natad sa pakigsangka, usa ra man gayod ang mopatigbabaw nga mananaog, siempre, kadtong maayong laki, ug mao kana si Manny.

Wala na tingali laing boksingero nga Pilipino nga susama ka inila ni Manny. Siya ra sab ang boksingero labihan naudunahan dili lamang pinaagi sa pakigbisog sa lona, kundili bisan sa natad sa mga pahinumdum. Si Manny ra sad boksingero nga dili hakugan sa iyang mga kinitaan. Gawas sa iyang pamilya, ubay-ubay sad ang mga natagaan ni Manny ug tabang.

Sa kadako sa iyang sapi, kibale, wala na kang Manny ang mogastos ug mapildi sa sugal ug milyones sa usa lang ka arangkada. Ganahan man si Manny sa basketball, billiards, casino ug sabong. Hinuon, kang Manny man na nga salapi. Iyang hinaguan. Wala bale kita labot unsaun na niya ug gastos.

Apan, tungod kay si Manny usa na ka inila ug modelo sa mga yanong Pilipino, dili mapugngan nga duna sad tulubagon si Manny sa mga katawhan nga nitaw-an kaniya isip usa ka panag-ingnan.

Asa man diay paingon king akong pang hinuklog?

Ang ako lang ba, nga sa kadaghan sa salapi ni Manny (nakalimot man gani siya nga naa diay siya dollar account sa California), imbes unta iyang hutdon ang sobrang sapi sa sugal ug sobrang lulinghayaw, tingali mas maayo nga tagaan ni Manny ug pagtagad ang uban niyang paisano sa GenSan, o ba kaha sa Sud Cotabato. Pila ba ka eskuylahang pang publiko ang nagkinahanglan ug dugang kwarto, silya ug kagamitan alang sa maayong pag-umol sa mga kabataan sa GEnsan?

Pila ka Health Center ang pwede nga ipahimo ni Manny?

Unsa ka dako sa gastos ug benepisyo ang libreng mga tambal ug paospital?

Dili man nato matag-an unsa plano ni Manny. Tingali, sa karon palabihon ni Manny nga maila siya isip usa ka adunahan nga boksingero nga nag gikan sa kalisud og nagdako sa tumang kapit-os, hangtud nga na asenso pina agi sa iyang singot ug dugo.

Tingali, mas palabihon ni Manny nga mahinumduman sa iyang mga paisano sa Gensan nga usa siya ka sikat ug banggiitan nga manggugubat sa lona.

Apan hinaut pa unta nga sa tanang grasya nga iyang nadawat sa iyang pag ka madaugon sa boksing, siya magiyahan sa maayong dalan ug iyang makita nga dako kaayo ang iyang ikatabang sa iyang mga paisano, labi na sa mga bata sa Gensan…

Hinaut pa unta nga dili na siya mag hunahuna nga modagan sa natad sa politika arong lang ingnon nga makatabang o maka silbi sa iyang katagilungsod.

Bay Manny, gamita ang imong posisyon sa kinabuhi sa pagtabang sa mga kabos ug mga bata sa imong lungsod. Ang imogn gipildi sa sugal, imong kwarta, pero kung imong gigamit sa pagtabang, makapahimo na ug dugang eskuylahan, dugang health center, or ba kaha tabang alang sa pag palambo sa kinitaan sa imong mga paisano.

Bay Manny, kaming tanan, sa walay pag duda, mitoo nga halayo pa ang imong maabot sa imong pag panimpalad. 

Apan, ang kinabuhi, di man nato matag-an.

Sa gihapon, akong suporta ug panghinaut, nga imong gamiton ang imong posisyon karon aron sa paghimo ug mga lakang nga maka ayo sa tanan — kanimo, sa imong pamilya, sa mga tawo sa imong palibot, ug sa imong mga higala ug mga magdadayeg.

Bisan tuod ug tulo na ka sangka ang wa nako nakit-an diri sa nasud nga akong gitrabahuan, apan pirmi ghapon ko  nga nagsunod sa mga balita mahitungod kanimo pinaagi sa Internet.

Mabuhi ka, bai Manny.

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s